Одблизу се запознавме со втората генерација на Serie 2 Active Tourer која е единствениот моноволуменски модел што доаѓа со баварски потпис.
Минативе две години, поминати под драматични околности диктирани од пандемијата, BMW ги преброди со многу мало влијание врз зацртаните планови.
Првенствено потпрени врз сопствени капацитети и ресурси тие цврсто се држеа до проектираната динамика на претствување нови модели.
Во тие планови секако учествуваше и Serie 2 Active Tourer која според сестраната употреба сеуште може да ја окарактеризираме како моноволумен.
Можеби поточно би било да говориме за облик кој е застанат на пола пат помеѓу хечбек и кросовер, но сепак тоа е помалку важно.
Втората генерација на спортскиот автомобил од премиум компактниот сегмент изобилува со динамичка експрсија. Современиот дизајнерски јазик е присутен и во надворешноста и во внатрешноста. Суштински редизајнирана внатрешност комбинира разновидни елементи од полуксузните автомобили на BMW.
„Новиот BMW серија 2 Active Tourer е одговор на предизвиците на секојдневното урбано живеење – спој помеѓу потребите за урбани активности и активности во природа, индивидуалниот и фамилијарниот живот, градските и далечните патувања.
Тој им нуди на патниците сместени на неговите пет седишта, забележително подобра удобност на подолги растојанија отколку неговиот претходник. Со совршен спој на префинетост и практичност, тој е сé што му треба на едно современо семејство“ – исткана Билјана Колемишевска при претставување на новитетот.
BMW серија 2 Active Tourer е веќе во продажба и достапен со четири варијанти на моделот: со преден погон и моќност од 136 до 218 KS. Новиот модел се произведува во фабриката на групацијата BMW во Лајпцих и ќе се нуди со мотори со внатрешно согорување, како и плаг-ин хибрид.
Новите верзии ќе се приклучат на серијата неколку месеци по претставувањето. Кај нив за првпат ќе биде вклучена BMW eDrive технологија од петтата генерација, која ја зајакнува динамиката и им дава значително подолг електричен опсег.
