Во време кога сите се колнат дека иднината на авто-индустрија е во електричните возила, има и такви кои попрво ќе го напуштат бизнисот отколку да ги продаваат.
Имено, General Motors им понуди од 300.000 до над милион долари на дилерите на Cadillac кои ќе се откажат од натамошно работење.
Причината за овој потег е што дилерите се незадоволни од тоа што мора да инвестираат по околу 200.000 долари за да можат да продаваат електрични возила.
Тие сметаат дека вложувањата во потребната опрема и алати за нивно одржување, обука на механичарите и инфраструктурата за полнење се превисоки и нема да се исплатат.
Затоа како компромисно решение со кое ќе бидат задоволни сите, раководството на General Motors се реши да им плати на оние што ќе го напуштат бизнисот.
Оние пак што ќе останат ќе можат да сметаат на повисока продажба, со која полесно ќе ги вратат вложените пари.
Така, околу 150 од вкупно 880 дилери на Cadillac во САД избрале дека им е попаметно да се откажат од марката отколку да инвестираат во електричната иднина.
Тоа се главно дилери во руралните средини кои покрај другите марки на General Motors од Cadillac продаваат меѓу 50 и 75 возила годишно, заради што не ја делат визијата за иднината.
Тие ќе имаат право уште наредната година да продаваат нови, а половни возила до 2024-тата.
Од GM одбиваат да кажат колку сето ова ќе влијае на нивните планови за масовна електрификација.
