Малиот C1 нема некој голем процент учество во продажбата на Citroen, но сепак раководството на компанијата е загрижено за неговата иднина.
Според извршниот директор Винсен Кобе, еколошките прописи прават да биде готово невозможно седум години стариот Citroen C1 да се замени.
Не се во прашање технологиите, туку нивната цена која заради заострувањето на емисиите расте експоненцијално.
Оваа класа возила и досега беше на граница на рентабилноста, заради што практично не постои модел кој самостојно е развиен.
Сите знаеме дека Citroen C1 е брат-близнак на Peugeot 108 и Toyota Aygo, кои се произведуваат во до скоро заедничката фабрика во Чешка.
PSA пред спојувањето со Fiat во Stellantis го продаде својот дел во неа на Јапонците, кои ја потврдија новата генерација на Aygo.
Но Французите се премислуваат и уште лани сугерираа дека промената на еколошките и пазарните услови можат да доведат до укинување на овој модел.
Сегашната изјава на Кобе само го потврдува нивниот став, кој всушност се однесува за целиот овој сегмент на мали градски возила, без разлика кој ги произведува.
