После две години на европскиот пазар, Toyota го освежи актуелниот Camry со благо дотерување.
Естетските измени на хибридната лимузина се сведуваат на рестилизираната маска и модификуваните браници, што според Toyota на Camry му обезбедуваат поголема динамичност и престиж.
Измени има и во внатрешноста, но тие пред сé се околу новиот 9-инчен екран на инфозабавниот систем кој е поставен повисоко за подобра видливост и полесна употреба, заради што и има побрз софтвер.
Нова е и премиум кожата на седиштата, а листата на функционалности на Toyota Safety Sense системите за асистенции е проширена.
Хибридниот погонски систем останува и понатаму комбинација на 2,5 литарски бензинец и електромотор со вкупно 218 KS и e-CVT менувач со опција за мануелно бирање на преносот.
Фабриката наведува дека Camry со него забрзува до 100 km/h за 8,3 секунди, дека просечно троши 4,3 l/100 km и емитува 98 грама на километар CO₂.
Продажбата на обновената хибридната лимузина на Toyota на европскиот пазар официјално ќе започне во првиот квартал 2021 година.
