Ford-Volkswagen: електрична соработка

Ford вети доста различен електричен автомобил базиран на MEB-платформата на VW

Откако во јануари 2019 година ги објавија своите планови, Ford и Volkswagen сега и официјално се во сојуз.

Предвидено е соработката да биде на три полиња – заедничко производство на доставни и електрични возила и развој на автономни технологии.

И додека другото е јасно (идните генерации на Caddy/Transit Connect, Amarok/Ranger и Transit/Transporter ќе бидат браќа), најмногу прашања има за идниот електричен автомобил на Ford поставен на MEB-платформата на Volkswagen.

Според соопштението за јавност, предвидено е овој модел да биде понуден на европскиот пазар почнувајќи од 2023 година.

Ќе биде развиен од страна на Ford во центарот во Келн, но не е прецизирано каде ќе се произведува – се знае само дека тоа ќе биде во Европа и дека VW ќе испорача 600.000 платформи за него.

Претседателот на Ford за Европа Стјуарт Роули потврдувајќи дека веќе размислуваат за уште еден модел.

Тој изјави дека возилата на Ford базирани на MEB-платформата ќе бидат доста различни од оние на VW групата, во која спаѓаат Audi, Seat и Škoda.

„Фокусирани сме на тоа овие возила да бидат Ford, да изгледаат како Ford, да се возат како Ford и да се чувствуваат како Ford“, додаде Роули.

Користењето на електричната архитектура на VW ќе му овозможи на Ford да го забрза развојот на достапен електричен автомобил, бидејќи цената на Mustang Mach-E чија продажба ќе започне идната година, изнесува 46.900 евра.

Цената на првиот MEB-базиран електричен автомобил на Volkswagen, моделот ID.3, изнесува 30.000 евра.