Ford се дели на уште две дивизии

За да ја засили својата позиција во иднината што го очекува светот на автомобилите, Ford ќе биде поделен на уште две дивизии кои засебно ќе бидат задолжени за класичните и електричните возила.

Ваквата бизнис трансформација треба да го забрза масовното производство на електрични возила и да го засили досегашното работење.

Двете дивизии ќе имаат потполно различен фокус на делување со што ќе се придонесе за независни насоки на развој и оптимално користење на ресурсите.

Ford Blue ќе продолжи со класичните возилата кои имаат мотори со внатрешно согорување, а акцентот ќе биде ставен на намалување на трошоците, поедноставување на производството и подобрување на квалитетот.

Задача на Ford Model e дивизијата ќе биде да се забрзаат иновациите и зголеми обемот на производство на чисто електрични возила.

Ford Blue ќе биде задолжен и за инженерските решенија и производствените капацитети на целата компанија, а Ford Model е за софтверот и конективните технологии за сите возила.

И двата нови дела на Ford, исто како и лани издвоената Ford Pro дивизија за комерцијалните возила, ќе бидат независни правни лица и ќе имаат сопствена организациска структура.

Според деловниот план Ford до 2026 година треба да произведува повеќе од 2 милиона возила годишно, односно една третина од целокупното производство, за што ќе бидат инвестирани дури 50 милијарди долари.